प्रश्न

अघिपछि लाउथ्यौ धाँक
पितृसत्ताको
खुब
कर्मैले जितेको सत्ता

हेरुँ न त पाइन म पनि भनी
भाकाले मात्रै मन पराइदिएँ
आँखाले मात्रै मन पराइदिएँ
तिम्ले माग्यौ भने बिचार गरौला भनी
ठिक्क पारेर मन मुटु
कुरें
औंशी गए पुर्ने गए

छेउ सम्म त आयौ
बस न भनेपछि बल्ल बस्यौ
आकाश हेर्यौ र पानी पर्ला जस्तो छ भन्यौ
धर्ती हेर्यौ र दशैं पनि आयो है भन्यौ
औंशी गए पुर्ने गए

खै
तिमीमा गहिरो गरी  गाडिएको
के छ!!!
मेरो बारे जान्न
मलाई कस्तो छ सुन्न
तिमी लागिपर्दा रहेछौ त
तिमीले मुटुमा उमारेर
मेरो लागि केही हुर्काएका त छैनौ ?

भन न त
पितृ सत्ताका माननीयज्यू
तिमीले ओठैमा ल्याएर
के अड्काएको ???