प्रभावशाली नेता हुन उखानतुक्का घोके हुन्छ

प्रभावशाली नेता हुन उखानतुक्का घोके हुन्छ
जिब्रो सारै बोधो भए अकबरे टोके हुन्छ

बिपक्षीलाई खुइल्याउने एउटै खेति गर्दा पनि
पत्रकार दाहिना हुन्जेल चर्कीचर्की खोके हुन्छ

अघिपछि दक्षिण फर्की यतैबाट अर्घ दिए नि
आँठे  पर्दा उतै गई दण्डवतले ढोगे हुन्छ

देशका नाममा सिन्को भाँच्ने लेठो किन गर्नु पर्यो
कुन कुन संघका डाम्नालाई टाउको टेकाई बोके हुन्छ

ठेकी छोडी हातमा दहि जमाएर बस्नु हुन्न
मकै खाने दाँतमै हान्नू दुई चार जना ठोके हुन्छ

तिघ्रा बलिया बनाउनु फेटा रातो कस्नु माथि
हान्ने तुजुक अझै नआए टन्न पहिल्यै धोके हुन्छ

शक्तिशाली नेता हुन उखानतुक्का घोके हुन्छ
बन्न लाग्या काम छ भने छिर्के हाली रोके हुन्छ