आँखाको बन्ध्याकरण

मन भालेको बाससँगै हरेक बिहान
डुल्न निस्किन्छ बाहिर

दिनभरिमा ककसको  के के
पुगिसरी देखेर आउँछ
हरेक साँझ आखाहरुलाई गर्भवती बनाउछ
अनि उज्यालो हुन नपाउदै
आँखाले कोरल्छे सपनाका चल्लाहरू
धेरै जसो  बिल गेट्स या लक्ष्मी मितल  जन्माउछे
आठपाँज देवकोटा र बाबुराम
टम क्रुज, ब्रिटनी स्पेयर्स
र माइकल ज्याक्सन

लालनपालन गर्ने
हुर्काउने सक्षम बनाउने
हुती बिचारै नगरी
लबस्तरो मन
हरेक साँझ यसरी नै
आँखाहरुलाई दुइजिउ बनाउदै
बिल गेट्स, देवकोटा र बाबुरामलाई
क्रुज, स्पेयर्स र ज्याक्सनलाई
सडकमा लगेर फालदिन्छ
र फर्केर साँझमा पुन:
आँखामाथि जाइलाग्छ

आँखा अनेकौं बेत ब्याएर
खोक्पा बुढी भइसकी
तेत्रो सन्तान उसका कहाँ गए
कुनै हिसाबै नदिइकन
लबस्तरो असन्तोकी  मन सधैं.....

अब आँखाले स्थायी बन्ध्याकरण सोच्दै छे
आफ्नु गच्छेअनुसार
त्यही बाँचेको एउटा बिर्खेलाई
हुर्काएर ठुलो मान्छे पार्छे रे ऊ.